IRIA ESTÉVEZ / FADO NORDÉS

Iria Estévez,

cantante galega de fado e músicas de raíz, que conta cun amplo percorrido no ámbito musical, tanto como intérprete como creadora de múltiples proxectos, destacando Clave de Fado ou Arifi (gañadores do Burgos, raíz e evolución, 2017).

Formouse en diferentes escolas e ámbitos, destacando o Mestrado de Artes Escénicas da UVIGO, o programa profesional da ETRAD ou a Escola de Música Moderna da UCA, na especialidade de canto e piano, ademais de formacións de técnica vocal con diferentes mestras, acadando unha gran versatilidade, froito tamén da súa experimentación ao longo da súa vida, explorando as súas posibilidades vocais e musicais, logrando un son propio, con grandes e ricos matices; unha voz profunda, enérxica, doce e con gran expresividade.

O FADO:

Nesta intensa e continua exploración, Iria Estévez descobre no fado unha canle profunda e universal, para experimentar a través da liberdade expresiva e estilística que o fado permite, dado o seu carácter   improvisativo, conseguindo así un estilo propio, achegando ao fado a natureza do canto galego ou inclusións da influencia doutros estilos populares da península ibérica.

O fado supón a vivencia intensa das emocións, xa sexan a paixón, as saudades, as penas ou as alegrías; cantar o fado é moito máis que unha técnica, pois supón a entrega, a apertura, a experiencia...

Asua primeira experiencia co ámbito do fado foi co seu proxecto  Clave de Fad, co que  publicou o seu primeiro traballo discográfico, Xanelas, que se centra nunha visión máis aberta do fado, a través da instrumentación, os arranxos, ou a interpretación vocal, mesturando temas propios e versións e incluíndo diferentes tipos de fado e cantiga galega.

​

Desde o comezo da súa carreira profesional, Iria Estévez levou a súa voz a escenarios de todo o territorio peninsular, destacando o , TEATRO CIRCO de Braga, festival FADO CONVERGÊNTE DE PORTUGAL, INTERFADO de Cataluña, o TEATRO COLÓN ou o FESTIVAL DE LA LUZ.

​

​